Íslenskt grafíkverkstæði / Félagið Íslensk grafík
Hafnarhúsinu, Tryggvagötu
Reykjavík 101
Iceland
Verkstæðið sem er rúmlega 300 fermetrar, er rekið af félaginu Íslensk grafík. Listamenn í félaginu ganga fyrir um aðgang að grafíkverkstæðinuog sýningarrými. Einnig greiða þeir lægstu þátttökugjöld. Verkstæðið er opið öllum íslenskum og erlendum listamönnum að uppfylltum eftirfarandi skilyrðum:
a) Almennt grundvallarskilyrði er að þeir sem óska eftir að vinna á grafíkverkstæðinu hafi menntun eða reynslu í notkun þeirra áhalda og tækja sem fyrirhugað er að nýta. Undantekningu má gera ef slíkur bakgrunnur er ekki fyrir hendi og verður viðkomandi þá að fá aðstoð faglærðs grafíklistamanns eða sækja námskeið sé um vinnu til lengri tíma að ræða.
b) Listamenn sem óska eftir að vinna á grafíkverkstæðinu verða fyrst að hafa samband við verkstæðisstjórn sem úthlutar tímum.
Verkstæðið er eingöngu ætlað til þrykkingar á listgrafík. Ekki er leyfilegt að nýta áhöld verkstæðisins til að þrykkja á t.d. boli, veggspjöld og þess háttar.
Hvert ár er skipulagt frá 1. maí til 30. apríl næsta árs. Þetta á við um skipulag bæði verkstæðis og sýningarrýmis. Skipulag er í höndum verkstæðisstjórnar. Þeir sem óska eftir að skrá sig hafi samband við verkstæðisstjórn starfandi samkvæmt skipuriti.
-- Aðeins þeir sem eru skuldlausir við félagið Íslensk grafík og við Íslenskt grafíkverkstæði eiga rétt til skráningar.
-- Greiða verður leigu fyrirfram fyrir umsamið leigutímabil. Við greiðslu fæst afhent aðgangskort að verkstæði.
Stjórn Íslensks grafíkverkstæðis hefur rétt til að velja allt að tvær grafíkmyndir á ári frá listamönnum sem nýta verkstæðið og sýningarrými félagsins Íslensk grafík. Sé upplag þrykkt á verkstæðinu er ennfremur ætlast til að eitt þrykk verði tileinkað Íslensku grafíkverkstæði, sérstaklega merkt.
Einnig til afnota fyrir erlenda listamenn
Auk verkstæðisins er í húsnæðinu sýningarsalur þar sem verk félagsmanna og annarra sem vinna á pappír, m.a. ljósmyndir og teikningar, eru sýnd.