Pollock- Krasner Foundation Inc.
863 Park Avenue
New York NY-10021
Alþjóðlegt / International
Sjóðurinn var stofnaður árið 1985 eftir lát Lee Krasner, en hún var mikilsvirtur málari og ekkja Jacksons Pollocks myndlistarmanns. Engir erfingjar vour að eignum Pollocks og Kranser sem voru barnlaus og ákvað því Kranser sem lést árið 1984 að eigum þeirra Pollocks yrði best fyrirkomið innan stofnunar sem hefði það megnmarkmið að styrkja aðra listamenn á mikilvægum tímamótum í lífi þeirra og starfi. Stofnunin er einkarekin og úthlutar styrkjum til myndlistarmanna.
Er hún sú stærsta sinnar tegundar í heimi og hefur síðan 1985 úthlutað 2.173 styrkjum til listamanna í 62 löndum að upphæð 30 milljón bandaríkjadollara (um 2,4 milljarðar íslenskra króna)
Styrkir eru að jafnaði veittir til eins árs og er upphæðin mismunandi eftir aðstæðum hvers og eins.
Formaður stjórnar stofnunarinnar er Charles C. Bergman og hefur hann ferðast víða um heim til að vekja athygli á tilvist Pollock-Krasner stofnunarinnar.
Umsóknir ár hvert skipta þúsundum en fjöldi styrkþega á árabilinu 1999-2000 voru 124. Rúm 27% styrkþega eru búsett annars staðar en í Bandríkjunum.
Sjóðurinn veitir alþjóðlega styrki til starfandi listmálara, skúlptúrista og listamanna sem vinna verk sín á pappír þ.m.t. grafíklistamenn. Ekki er tekið við umsóknum fagljósmyndara eða kvikmynda- og vídeólistamanna. Úthlutunin ræðst á listrænni hæfni (mati á verkum) og fjárhagslegri þörf einstakra listamanna. Dómnefnd er skipuð fagfólki á sviði myndlistar. Með umsókn þarf að senda myndir af verkum en auk þess gera grein fyrir fjárhagsstöðu sinni. Tekið er við umsóknum allt árið. Styrkir eru venjulega veittir til eins árs. Ekki eru veittir styrkir til greiðslu gamalla skulda heldur er ætlast til að listamaðurinn noti féð til áframhaldandi starfa á sviði myndlistar, hvort sem það er til að borga leigu á vinnustofu og efniskostnað eða vinnu við uppsetingu eigin sýninga. Stofnunin veitir einnig aðstoð vegna persónulegra aðstæðna listamanna s.s. sjúkrakostnaðar.
Pollock-Krasner stofnunin veitir ekki styrki til listnema eða þeirra sem nýlokið hafa námi. Umsækjandi þarf að hafa starfað að list sinni í nokkurn tíma. Ekki er endilega nauðsynlegt að hafa skapað sér nafn eða viðurkenningu né hafa starfað eingöngu að listsköpun en ljóst verður að vera að viðkomandi hafa starfað alvarlega að list sinni í einhvern tíma.
Umsóknareyðublöð og nánari upplýsingar eru að finna á heimasíðu sjóðsins, sjá hér að ofan.
Brynhildur Þorgeirsdóttir og Erla Þórarinsdóttir hafa hlotið styrk hjá stofnuninni.